توشہ خانہ کیس بوگس ہے، سابق وزیر اعظم عمران خان نے قوم کے لیے ہر قربانی اور شہادت تک قبول کرنے کا پیغام دیا ہے.علیمہ خان

اسٹاف رپورٹ: پی این نیوز ایچ ڈی

بانی چیئرمین پاکستان تحریک انصاف عمران خان کی ہمشیرہ علیمہ خان نے کہا ہے کہ پارٹی کا جو بھی لیڈر مذاکرات کی بات کرتا ہے، وہ نہ عمران خان کے ساتھ ہے اور نہ ہی بانی پی ٹی آئی کی پالیسی کی نمائندگی کرتا ہے.

انسدادِ دہشت گردی عدالت راولپنڈی کے باہر میڈیا سے گفتگو کرتے ہوئے علیمہ خان کا کہنا تھا کہ عمران خان اپنا مؤقف واضح کر چکے ہیں اور انہوں نے اسٹریٹ موومنٹ کا پیغام خیبر پختونخوا کی قیادت کو دے دیا ہے.

انہوں نے کہا کہ تحریک تحفظ آئین پاکستان کی دو روزہ کانفرنس کے اعلامیے کے بارے میں انہیں کوئی علم نہیں۔ علیمہ خان کے مطابق عمران خان نے گزشتہ برس 22 نومبر کو پرامن احتجاج کی کال دی تھی اور ان پر یہ الزام عائد کیا گیا ہے کہ انہوں نے بانی پی ٹی آئی کا پیغام عوام تک پہنچایا.

علیمہ خان نے بانی پی ٹی آئی اور بشریٰ بی بی کے خلاف توشہ خانہ کیس کو بوگس قرار دیتے ہوئے کہا کہ عمران خان نے پرسوں بھی پیغام بھیجا ہے کہ وہ قوم کے لیے ہر قربانی دینے کو تیار ہیں اور شہادت بھی قبول کریں گے.

انہوں نے مزید بتایا کہ عمران خان کو 11 کتابیں بھجوائی گئی تھیں، جن میں سے 9 کتابیں جج کے مطابق انہیں موصول ہو چکی ہیں.