سپریم کورٹ کا بیرسٹر سلمان صفدر کو سابق وزیراعظم عمران خان سے ملاقات کی اجازت دینے کا حکم

اسٹاف رپورٹ :پی این نیوز ایچ ڈی

سپریم کورٹ آف پاکستان نے بیرسٹر سلمان صفدر کو بانی پاکستان تحریک انصاف اور سابق وزیرِاعظم عمران خان سے ملاقات کی اجازت دیتے ہوئے انہیں عدالتی نمائندہ مقرر کر دیا ہے۔ یہ اجازت توشہ خانہ فوجداری کیس کے ٹرائل کے خلاف دائر اپیلوں پر سماعت کے دوران دی گئی.

چیف جسٹس یحییٰ آفریدی کی سربراہی میں دو رکنی بینچ نے کیس کی سماعت کی۔ عدالت نے حکم دیا کہ بیرسٹر سلمان صفدر جیل جا کر بانی پی ٹی آئی عمران خان سے ملاقات کریں اور ان کی صحت، حالتِ زار اور جیل میں فراہم کی جانے والی سہولیات سے متعلق تفصیلی تحریری رپورٹ عدالت میں پیش کریں.

چیف جسٹس نے اٹارنی جنرل کو ہدایت کی کہ ملاقات کے دوران بیرسٹر سلمان صفدر کو کسی قسم کی رکاوٹ کا سامنا نہ ہو۔ عدالت نے واضح کیا کہ سلمان صفدر کو مکمل رسائی دی جائے اور اگر کسی مرحلے پر کوئی مسئلہ درپیش آئے تو وہ براہِ راست عدالت سے رابطہ کر سکتے ہیں.

عدالت نے سپرنٹنڈنٹ اڈیالہ جیل سے بھی بانی پی ٹی آئی عمران خان کے حوالے سے رپورٹ طلب کر لی۔ چیف جسٹس کا کہنا تھا کہ بیرسٹر سلمان صفدر ملاقات کے بعد رپورٹ پیش کریں گے، رپورٹ کا جائزہ لے کر آئندہ سماعت پر مزید فیصلہ کیا جائے گا.

سماعت کے دوران اٹارنی جنرل نے عدالت میں 5 اگست سے 18 اگست 2023 تک کی رپورٹ پیش کی اور بتایا کہ یہ رپورٹ عمران خان کے اٹک جیل میں قید کے دوران کی ہے.

اس موقع پر وکیل لطیف کھوسہ روسٹرم پر آئے اور مؤقف اختیار کیا کہ انہیں بھی عمران خان سے ملاقات کی اجازت نہیں دی جا رہی۔ اس پر چیف جسٹس نے ریمارکس دیے کہ عدالت اس حوالے سے حکم جاری کر چکی ہے اور بیرسٹر سلمان صفدر آج ہی ملاقات کے لیے جائیں گے.

عدالت نے قرار دیا کہ پیش کی جانے والی رپورٹس کا جائزہ لینے کے بعد آئندہ سماعت پر مزید احکامات جاری کیے جائیں گے۔ بعد ازاں سپریم کورٹ نے کیس کی سماعت 12 فروری تک ملتوی کر دی.

دوسری جانب بیرسٹر سلمان صفدر نے سپریم کورٹ کے حکم پر آج دوپہر 2 بجے اڈیالہ جیل میں بانی پی ٹی آئی عمران خان سے ملاقات کی تصدیق کر دی۔ وہ عدالتی احکامات کے تحت اڈیالہ جیل روانہ ہو گئے، جہاں ملاقات کے بعد اپنی رپورٹ سپریم کورٹ میں جمع کروائی جائے گی.