ریاض بلوچ ویانا آسٹریا :پی این پی نیوز ایچ ڈی
ویانا میں سفارت خانہ پاکستان اور ویانا اسکول آف انٹرنیشنل اسٹڈیز کے زیر اہتمام جیو پولیٹیکل آرڈر میں درمیانی طاقتوں کے لیے چیلنجز اور مواقع کے موضوع پر سیمینار کا اہتمام کیا گیا، جس میں آسٹریا، چین، ترکی، بنگلہ دیش، سری لنکا، میکسیکو, کینیڈا کے سفیروں. اقوام متحدہ کے متعدد سفارت کاروں اور بین الاقوامی برادری کے نمائندوں سمیت سفیروں کی بڑی تعداد نے شرکت کی۔
اس موقع پر خصوصی خطاب بذریعہ زوم محترمہ حنا ربانی کھر، چیئرمین، خارجہ تعلقات کمیٹی، قومی اسمبلی پاکستان نے کیا۔
تقریب کے دیگر مقررین میں چین کے آسٹریا میں سفیر لی سونگ، سفیر کارل ہالرگارڈ (ای یو),مصطفیٰ کبروگلو (ڈی پی آر ترکی),پیٹر حیدر، صدر یونیورسل پیس فیڈریشن آسٹریا. گیرہارڈ سیلر، (ایم ایف اے آسٹریا) اور سفیر پاکستان کامران اختر ملک شامل تھے۔
محترمہ کھر نے عالمی مسائل کے حل میں کثیرالجہتی کی مرکزیت پر زور دیا۔ وہ جنوبی ایشیا، مشرق وسطیٰ، مشرقی یورپ اور دنیا کے دیگر حصوں میں تنازعات کے تناظر میں اقوام متحدہ کے مفلوج ہونے کا حوالہ دینے کی ضرورت پر مزید زور دیتی رہیں۔
تمام مقررین نے بلوچستان کے شہر خضدار میں ہونے والے دہشت گردی کے گھناؤنے واقعے کی غیر واضح الفاظ میں مذمت کی اور کہا کہ معصوم بچوں کو نشانہ بنانے کو کسی طور بھی درست نہیں کہا جا سکتا۔ مزید ان کا کہنا تھا۔ قوانین پر مبنی بین الاقوامی آرڈر واضح قوانین اور اصول فراہم کرتا ہے، کثیرالجہتی اس بات کو یقینی بناتی ہے کہ تمام ممالک چاہے چھوٹے ہوں یا بڑے، عالمی معاملات میں ایک آواز ہیں۔
اپنے خطاب میں، سفیر کامران اختر نے عالمی کثیرالجہتی نظام کے لیے پاکستان کی ثابت قدم حمایت کا اعادہ کیا، ساتھ ہی جموں و کشمیر اور فلسطین سمیت دیرینہ تنازعات کے حل میں اقوام متحدہ کی خامیوں کو بھی اجاگر کیا۔ انہوں نے اس بات پر زور دیا کہ عالمی امن اور سلامتی کے لیے ایک مضبوط اور موثر اقوام متحدہ ضروری ہے۔ سفیر پاکستان نے تنازعات کا پرامن حل اور تمام ریاستوں کی خودمختاری اور علاقائی سالمیت کے تحفظ سمیت اقوام متحدہ کے چارٹر کے بنیادی اصولوں کو برقرار رکھنے کی اہمیت پر بھی زور دیا۔
سیمینار کے اخر میں سفارت خانہ پاکستان کی جانب سے تمام لوگوں کے لیے کھانا رکھا گیا۔
