پاکستان انڈر 19 ٹیم آئی سی سی انڈر 19 ورلڈ کپ کے لیے زمبابوے روانہ

اسٹاف رپورٹ :پی این نیوز ایچ ڈی

ایشین چیمپئن پاکستان انڈر 19 کرکٹ ٹیم زمبابوے میں ہونے والی تین ملکی سیریز اور آئی سی سی انڈر 19 ورلڈ کپ میں شرکت کے لیے اسلام آباد سے روانہ ہو گئی ہے.

ٹیم کی قیادت فرحان یوسف کر رہے ہیں۔ روانگی سے قبل چیئرمین پاکستان کرکٹ بورڈ محسن نقوی نے ہوٹل میں ٹیم سے ملاقات کی، کھلاڑیوں اور آفیشلز کے ساتھ نیک تمناؤں کا اظہار کیا اور انہیں بہترین کارکردگی دکھانے کی تلقین کی.

پاکستان انڈر 19 ٹیم اسلام آباد سے براستہ دبئی زمبابوے کے دارالحکومت ہرارے روانہ ہو گی۔ اسکواڈ میں شامل تمام 15 کھلاڑیوں کے علاوہ ٹیم مینجمنٹ کے ارکان بھی اسی پرواز کے ذریعے سفر کر رہے ہیں.

پاکستان انڈر 19 ٹیم زمبابوے میں ہونے والی تین ملکی سیریز کے ساتھ ساتھ آئی سی سی انڈر 19 ورلڈ کپ میں بھی شرکت کرے گی۔ تین ملکی سیریز کا آغاز 25 دسمبر سے ہو گا جبکہ پاکستان انڈر 19 ٹیم اپنا پہلا میچ 27 دسمبر کو کھیلے گی.

پی سی بی حکام کے مطابق روانگی سے قبل کھلاڑی پُرعزم اور پُراعتماد نظر آئے، جبکہ ٹیم انتظامیہ نے دورے کے دوران شاندار کارکردگی کی امید ظاہر کی ہے.