پاکستان تحریک انصاف کے کارکنان کا ملک گیر احتجاج،سابق وزیر اعظم عمران خان کے علاج اور فوری رہائی کا مطالبہ شدت اختیار کر گیا
اسٹاف رپورٹ :پی این نیوز ایچ ڈی
پاکستان تحریک انصاف نے سابق وزیر اعظم اور بانی چیئرمین عمران خان کے علاج معالجے اور رہائی کے مطالبات کے حق میں ملک کے مختلف شہروں میں احتجاجی مظاہرے کیے۔ پارٹی قیادت کا کہنا ہے کہ عمران خان کی صحت سے متعلق تحفظات میں اضافہ ہو رہا ہے، اس لیے انہیں فوری طور پر مکمل طبی سہولیات فراہم کی جائیں.
پی ٹی آئی رہنماؤں کے مطابق سابق وزیر اعظم عمران خان کا طبی معائنہ آزاد اور مستند ڈاکٹروں کے بورڈ سے کروایا جائے اور اس عمل میں خاندان کے افراد کو بھی شامل ہونے کی اجازت دی جائے۔ ان کا مؤقف ہے کہ یکطرفہ طبی رپورٹس سے شفافیت پر سوالات اٹھتے ہیں، اس لیے مکمل میڈیکل رپورٹ عوام کے سامنے لائی جائے.
دوسری جانب پارٹی نے عمران خان کی رہائی کا مطالبہ بھی دہرایا ہے۔ مظاہرین کا کہنا تھا کہ سیاسی بنیادوں پر مقدمات قائم کیے گئے ہیں اور انہیں انصاف کے تقاضوں کے مطابق فوری ریلیف دیا جانا چاہیے۔ مختلف شہروں میں کارکنوں نے ریلیاں نکالیں اور بینرز اٹھا کر اپنے مطالبات پیش کیے.
پی ٹی آئی قیادت نے خبردار کیا ہے کہ اگرسابق وزیر اعظم عمران خان کو مناسب طبی سہولیات فراہم نہ کی گئیں اور رہائی کے معاملے پر پیش رفت نہ ہوئی تو احتجاج کا دائرہ مزید وسیع کیا جائے گا.
حکومتی حلقوں کی جانب سے تاحال باضابطہ ردعمل سامنے نہیں آیا، تاہم ذرائع کا کہنا ہے کہ متعلقہ ادارے صورتحال پر نظر رکھے ہوئے ہیں۔ سیاسی مبصرین کے مطابق یہ معاملہ آنے والے دنوں میں ملکی سیاست پر نمایاں اثرات مرتب کر سکتا ہے.
