پاکستان تحریک انصاف خیبرپختونخوا کا امن و امان کے حوالے سے مجوزہ امن جرگہ پر اہم مشاورتی اجلاس
امن جرگہ 12 نومبر کو صبح 11 بجے خیبرپختونخوا اسمبلی ہال میں منعقد ہو گا، جس میں صوبے کی تمام سیاسی جماعتوں کے سربراہان، صدور اور جنرل سیکریٹریز، صوبے کے سابق وزرائے اعلیٰ، سول سوسائٹی کے نمائندگان اور خیبرپختونخوا بار ایسوسی ایشن کے اکابرین شرکت کریں گے
اسٹاف رپورٹ: پی این نیوز ایچ ڈی
پاکستان تحریک انصاف خیبرپختونخوا کا صوبے میں امن و امان کی صورتحال اور مجوزہ امن جرگہ کے حوالے سے ایک اہم مشاورتی اجلاس منعقد ہوا۔
اجلاس کی صدارت وزیراعلیٰ خیبرپختونخوا محمد سہیل آفریدی اور صوبائی صدر جنید اکبر نے مشترکہ طور پر کی۔
اجلاس میں اسپیکر صوبائی اسمبلی بابر سلیم سواتی، معاون خصوصی برائے اطلاعات شفیع جان،صوبائی وزیر قانون آفتاب عالم، صوبائی جنرل سیکرٹری علی اصغر خان، صوبائی وزیرو مینا خان آفریدی،اور ارکانِ قومی اسمبلی عاطف خان، ڈاکٹر امجد خان، ارباب شیر علی اور عرفان سلیم سمیت دیگر پارٹی رہنماؤں نے شرکت کی۔
اجلاس میں صوبے کی مجموعی سیاسی صورتحال اور امن و امان کے امور پر تفصیلی غور و خوض کیا گیا۔ شرکاء نے امن جرگہ کے انعقاد اور آئندہ کی حکمتِ عملی کے مختلف پہلوؤں پر مشاورت کی۔
یہ فیصلہ کیا گیا کہ امن جرگہ میں تمام سیاسی جماعتوں کو شرکت کی دعوت دی جائے گی تاکہ صوبے میں دیرپا امن و استحکام کے قیام کے لیے تمام سیاسی قیادت کو ایک مشترکہ پلیٹ فارم پر متحد کیا جا سکے۔
مزید یہ طے پایا کہ امن جرگہ 12 نومبر کو صبح 11 بجے خیبرپختونخوا اسمبلی ہال میں منعقد ہو گا، جس میں صوبے کی تمام سیاسی جماعتوں کے سربراہان، صدور اور جنرل سیکریٹریز، صوبے کے سابق وزرائے اعلیٰ، سول سوسائٹی کے نمائندگان اور خیبرپختونخوا بار ایسوسی ایشن کے اکابرین شرکت کریں گے۔
