محسن نقوی کا عالمی برادری سے دہشت گردی کے خلاف مشترکہ اقدامات پر زور
اسٹاف رپورٹ :پی این نیوز ایچ ڈی
وفاقی وزیر داخلہ محسن نقوی نے کہا ہے کہ پاکستان دہشت گردی کے خلاف پوری دنیا کے لیے ایک مضبوط ڈھال کا کردار ادا کر رہا ہے اور آج عالمی برادری کو دہشت گردی کے خطرات سے نمٹنے کے لیے مشترکہ اور مؤثر اقدامات کی اشد ضرورت ہے.
وفاقی وزیر داخلہ محسن نقوی سے اطالوی وزیر داخلہ میٹیو پینٹے ڈوسی اور یورپین کمشنر میگنس برنر نے ٹیلیفونک رابطہ کیا، جس میں انہوں نے اسلام آباد میں ہونے والے خودکش دھماکے کی شدید مذمت کی اور دہشت گرد حملے میں جانی نقصان پر دلی افسوس کا اظہار کیا.
اطالوی وزیر داخلہ نے گفتگو کے دوران کہا کہ المناک واقعے کی خبر سن کر گہرا دکھ ہوا، اٹلی کی حکومت اور اپنی جانب سے متاثرہ خاندانوں کے ساتھ مکمل یکجہتی کا اظہار کرتے ہیں۔ انہوں نے کہا کہ اٹلی ہر قسم کی دہشت گردی کی سخت مذمت کرتا ہے اور دہشت گردی کے مشترکہ خطرے سے نمٹنے کے لیے پاکستان کے ساتھ تعاون جاری رکھنے کے لیے تیار ہے.
یورپین کمشنر میگنس برنر نے بھی واقعے پر افسوس کا اظہار کرتے ہوئے کہا کہ ان کی دعائیں متاثرین اور ان کے اہلِ خانہ کے ساتھ ہیں اور دکھ کی اس گھڑی میں یورپی یونین پاکستانی عوام کے ساتھ کھڑی ہے.
وفاقی وزیر داخلہ محسن نقوی نے مشکل وقت میں اظہارِ یکجہتی پر اطالوی وزیر داخلہ اور یورپین کمشنر کا شکریہ ادا کیا۔ انہوں نے کہا کہ پاکستان نے دہشت گردی کے خلاف جنگ میں بھاری جانی اور مالی قربانیاں دی ہیں اور عالمی امن کے لیے اپنی ذمہ داریاں پوری کرتا رہے گا.
محسن نقوی نے مزید کہا کہ دہشت گردی ایک عالمی مسئلہ ہے جس سے نمٹنے کے لیے دنیا کے تمام ممالک کو مشترکہ حکمتِ عملی اور عملی تعاون کو فروغ دینا ہوگا.
