پختونخوا میں ملٹری آپریشن کی اجازت نہیں دینگے: سہیل آفریدی

اسٹاف رپورٹ :پی این نیوز ایچ ڈی

وزیر اعلی ٰخیبرپختونخوا ٰ سہیل آفریدی نے کہا ہے صوبائی حکومت کسی بھی ملٹری آپریشن کی اجازت نہیں دے گی.صوبائی کابینہ سے خطاب کرتے ہوئے سہیل آفریدی نے کہا 15 نکاتی ایجنڈے میں واضح کیا گیا کہ ملٹری آپریشن کسی بھی مسئلے کا حل نہیں،خیبر پختونخوا حکومت کا بھی یہی واضح موقف ہے کہ ملٹری آپریشن مسائل کا حل نہیں، بند کمروں میں کیے گئے فیصلے صوبے پر مسلط کیے گئے تو تمام سٹیک ہولڈرز میں تشویش پیدا ہوگی.

انہوں نے کہا کہ ایک فرد یا ایک ادارہ زور زبردستی صوبے پر فیصلے مسلط نہیں کر سکتا، زبردستی فیصلوں کے نتائج وہ نہیں ہوں گے جو فیصلہ کرنے والے چاہتے ہیں، پائیدار امن کے لیے تمام اداروں، سیاسی و مذہبی جماعتوں اور قبائلی مشران پر مشتمل جامع پالیسی ناگزیر ہے، تمام فریق مل کر بیٹھیں گے تو مؤثر پالیسی بنے گی اور امن بحال ہوگا.

انہوں نے کہا کہ بند کمروں کے فیصلوں سے نہ امن بحال ہوگا اور نہ ہی عوام کا اعتماد قائم ہوگا۔دریں اثنا اسلام آباد بار کونسل کی تقریب سے خطاب کرتے ہوئے سہیل آفریدی نے کہا خیبرپختونخوا میں آپریشن کی تیاری ہو رہی ہے ، یہ بدمعاشی ہے ، پاکستان جس نہج پر پہنچ گیا ہے آگے تباہی ہے ،ہم نے خیبرپختونخوا کی تمام مذہبی و سیاسی جماعتوں کو اکٹھا کیا، سب نے متفقہ طور پر کہا ملٹری آپریشن نہیں ہونا چاہیے ،ہم مزاحمت کر رہے ہیں اور آخری سانس تک مقابلہ کریں گے.

جس طرح آج پی ٹی آئی ڈٹی ہے کوئی سیاسی جماعت نہیں ٹک سکے گی. ہماری سندھ، پنجاب اور بلوچستان کی بہنوں کی مزاحمت دیکھ کر حوصلہ ملتا ہے. انہوں نے کہا کہ اگر آج مجھ پر مشکل وقت ہے تو کل آپ پر بھی آنا ہے ، آگ کل سب کے گھر کو لگے گی، اگر آپ نے آواز اٹھائی اور ساتھ رہے تو آپ کا گھر بھی بچے گا، اگر آپ چپ رہیں گے تو کل آپ کی باری ہوگی.

سہیل آفریدی نے کہا عمران خان کو اللہ نے سب کچھ دیا ہے کسی چیز کی ضرورت نہیں ہے . وہ ہماری جنگ لڑ رہا ہے ، ان کے ساتھ جو ظلم و جبر اور فسطائیت ہو رہا ہے وہ پوری دنیا دیکھ رہی ہے.
آئین کی سربلندی کے لیے سر کٹ جائیں کوئی پروا نہیں ہے. اگر ہم آئین کی سربلندی کیلئے کھڑے نہیں ہوتے تو کل کو ہمارے بچے ہم پر تھوکیں گے.
وزیراعلیٰ کا کہنا تھا توشہ خانہ سے گاڑیاں لینے والے اقتدار میں ہیں اور قانونی طریقے سے چیز لینے والا جیل میں ہے.

ہمیں عمران خان کا ساتھ دینا ہے ، ہمیں 26 ویں اور 27 ویں ترمیم کیخلاف کھڑا ہونا ہوگا۔ وکلاء تحریک کا اعلان کریں، پاکستان کا ہر نوجوان انکے ساتھ کھڑا ہوگا.

تقریب سے خطاب کرتے ہوئے ریاست علی آزاد کا کہنا تھا وکلاء نے ہمیشہ سچ کا ساتھ دیا ہے، میں ہمیشہ حق آئین اور قانون کی بات کرتا ہوں، میں نے ہمیشہ بکنے والے لوگوں کی نشاندہی کی ہے.

ریاست علی آزاد نے کہالوگوں کو گھروں سے اٹھانے پر خاموش رہنے والوں کو شرم آنی چاہیے ، بکنے والے لوگ بار کی قیادت نہیں کر سکتے ۔ترجمان بانی پی ٹی آئی نیاز اللہ نیازی کا کہنا تھاوکلاء کو دبایا جا رہا ہے ، میں میڈیا کو سلام پیش کرتا ہوں.

آئین کو ختم کر دیا گیا ہے ، وکلاء کی آزادی کو تہس نہس کر دیا گیا،وزیر اعلیٰ نے چیف جسٹس و دیگر کو خط لکھا مگر کچھ نہیں بنا، کیا آئین اور قانون کی بات کرنا جرم ہے؟، اگر جرم ہے تو ہم بار بار کریں گے ۔ ہم وزیر اعلیٰ سہیل آفریدی کے ساتھ کھڑے ہیں.