سابق وزیراعظم عمران خان کی تصاویر والی پتنگیں سامنے آ گئیں، پنجاب حکومت نے پابندی عائد کر دی
اسٹاف رپورٹ :پی این نیوز ایچ ڈی
بسنت کے موقع پر ممکنہ اشتعال انگیزی اور امن و امان کی صورتحال کے پیش نظر حکومتِ پنجاب نے دفعہ 144 نافذ کرتے ہوئے مذہبی اور سیاسی نقش و نگار والی پتنگوں پر مکمل پابندی عائد کر دی ہے۔ حالیہ دنوں میں عمران خان کی تصاویر والی پتنگیں سامنے آنے کے بعد حکومت نے فوری طور پر کارروائی کرتے ہوئے ایسے تمام مواد کو ممنوع قرار دے دیا ہے.
نوٹیفکیشن کے مطابق 30 روز کے لیے مذہبی مقدس کتب، مذہبی مقامات، کسی بھی شخصیت، سیاسی جماعت یا کسی ملک کے جھنڈے کی تصاویر والی پتنگوں کی تیاری، خرید و فروخت، نقل و حمل، ذخیرہ اور استعمال پر پابندی ہوگی۔ تاہم بسنت کے دوران بغیر تصویر سادہ یک رنگی یا کثیر رنگی پتنگوں کے استعمال کی مشروط اجازت دی گئی ہے.
حکام کا کہنا ہے کہ بسنت کے دوران بعض عناصر کی جانب سے مذہبی یا سیاسی علامات کے استعمال کا اندیشہ تھا، جس کے باعث یہ فیصلہ کیا گیا۔ خلافِ قانون پتنگوں کی تیاری، فروخت یا استعمال کو قابلِ تعزیر جرم قرار دیا گیا ہے، جبکہ قانون نافذ کرنے والے اداروں کو سخت کارروائی کی ہدایت جاری کر دی گئی ہے.
ڈپٹی کمشنر لاہور نے پنجاب کائٹ فلائنگ ایکٹ 2025 کے تحت بسنت 2026 کا نوٹیفکیشن جاری کرتے ہوئے بتایا کہ لاہور میں 6 تا 8 فروری محفوظ بسنت کی مشروط اجازت دی گئی ہے۔ ترجمان محکمہ داخلہ پنجاب کے مطابق حکومت نے بسنت کو ایک تفریحی تہوار کے طور پر منانے کی اجازت دی ہے، تاہم کسی قسم کی قانون شکنی برداشت نہیں کی جائے گی اور عوام کے مذہبی جذبات کے احترام کو یقینی بنایا جائے گا.
پنجاب کائٹ فلائنگ ایکٹ 2025 کے تحت دھاتی تار، نائلون یا شیشے سے لیپ شدہ ڈور کے استعمال پر مکمل پابندی ہے۔ خطرناک ڈور اور پتنگوں کی تیاری، نقل و حمل، ذخیرہ، فروخت اور استعمال ممنوع قرار دیا گیا ہے.
قانون کے مطابق مقررہ تاریخوں سے قبل یا خلافِ ضابطہ پتنگ بازی پر 5 سال قید اور 20 لاکھ روپے تک جرمانہ ہو سکتا ہے، جبکہ ممنوعہ مواد کی تیاری یا فروخت میں ملوث افراد کو 7 سال قید اور 50 لاکھ روپے تک جرمانہ کی سزا دی جا سکتی ہے.
