ریاض میراتھن کا پانچواں ایڈیشن کامیابی سے منعقد، ہزاروں مقامی و بین الاقوامی رنرز کی شرکت
اسٹاف رپورٹ :پی این نیوز ایچ ڈی
ریاض میراتھن کے پانچویں ایڈیشن کا انعقاد شاندار انداز میں کیا گیا، جس میں ہزاروں مقامی اور بین الاقوامی رنرز نے شرکت کی۔ یہ ایونٹ سعودی عرب میں صحت مند طرزِ زندگی، جسمانی سرگرمی اور کھیلوں کے فروغ کی ایک نمایاں مثال بن چکا ہے.
سعودی اسپورٹس فار آل فیڈریشن کے صدر شہزادہ خالد بن الولید بن طلال نے کہا کہ ریاض میراتھن اب سعودی معاشرتی زندگی کا باقاعدہ حصہ بن چکی ہے۔ ان کا کہنا تھا کہ یہ میراتھن نہ صرف جسمانی صحت کے فروغ کا ذریعہ ہے بلکہ مختلف علاقوں اور ثقافتوں سے تعلق رکھنے والے افراد کو ایک پلیٹ فارم پر اکٹھا کر کے قومی یکجہتی کو بھی مضبوط بناتی ہے.
ریاض میراتھن میں اوورسیز پاکستانیوں نے بھی بھرپور شرکت کی۔ انجینئر سلمان راشد، انجینئر ادریس احمد، انجینئر وقار احمد سمیت پاکستانی کمیونٹی کی بڑی تعداد نے ایونٹ میں حصہ لیا اور صحت مند سرگرمیوں کے فروغ میں اپنا کردار ادا کیا۔ بچوں کی کیٹگری میں پاکستانی بچوں نویرا سلمان، حاشر سلمان اور حارث سلمان نے شاندار کارکردگی کا مظاہرہ کرتے ہوئے میڈلز حاصل کیے، جس پر پاکستانی کمیونٹی نے خوشی اور فخر کا اظہار کیا.
ریاض میراتھن کے انعقاد میں وزارتِ کھیل، سعودی اولمپک و پیراالمپک کمیٹی، سعودی ایتھلیٹکس فیڈریشن، نیشنل ایونٹس سینٹر، ریاض میونسپلٹی، شاہی کمیشن برائے ریاض شہر اور سعودی ٹورازم اتھارٹی سمیت متعدد سرکاری ادارے شراکت دار ہیں، جو اس ایونٹ کی کامیابی میں اہم کردار ادا کر رہے ہیں۔
اس موقع پر کہا گیا کہ اسپورٹس اور ویلنَس ایونٹس معاشرے میں نہ صرف صحت مند طرزِ زندگی کو فروغ دیتے ہیں بلکہ مختلف ثقافتوں، علاقوں اور سماجی رویّوں کو قریب لا کر قومی ہم آہنگی اور یکجہتی کو بھی مضبوط بناتے ہیں.
