(سٹاف رپورٹ، پاک نیوز پوائنٹ )
وفاقی وزیر تعلیم شفقت محمود کی زیر صدارت اجلاس ہوا، جس میں انٹرمیڈیٹ امتحان کے منتظر تمام طلباء کو ای کیٹ امتحان میں بیٹھنے کی اجازت دینے کا فیصلہ کیا گیا۔
اجلاس میں کووڈ 19 کی وجہ سے تعلیمی سال اور امتحانات مؤخر ہونے کے سبب انجنیئرنگ یونیورسٹیز میں بروقت داخلے کو یقینی بنانے اور طلبہ کے سال کو ضائع ہونے سے بچانے کے لیے مختلف آپشنز پر تفصیلی تبادلہ خیال کیا گیا۔وزارت تعلیم کے مطابق طالب علم کو انجنیئرنگ امتحان میں بیٹھنے سے روکا نہیں جائے گا۔انجینئرنگ کونسل اور ایچ ای سی کے اجلاس میں متفقہ فیصلہ ہوا کہ تمام طلبہ جن کا انٹرمیڈیٹ کا امتحان ہو چکا ہے ان سب کو ای کیٹ امتحان میں بیٹھنے کی اجازت ہوگی، فیصلے کا مقصد کورونا وائرس کی وجہ سے طلبا کا تعلیمی سال ضائع ہونے سے بچانا ہے۔وزارت تعلیم کا کہنا ہے کہ کیمبرج کے A2 کے طلبہ کو بھی ای کیٹ اور انجنیئرنگ کے داخلہ امتحانات میں بیٹھنے کی اجازت ہوگی جبکہ یونیورسٹیز ان کو پروویژنل ایڈمیشن دیں گی جو کہ ان کے فائنل امتحان سے مشروط ہوگا۔اجلاس میں وفاقی وزیر تعلیم شفقت محمود نے کہا طلبہ اور تعلیمی اداروں کے لیے رواں سال غیر معمولی نوعیت کا سال ہے، اس لیے ہمیں غیر معمولی فیصلے لینے پڑے ہیں۔ متعلقہ اتھارٹیز کا طلبہ کو ایسی سہولت کاری مہیا کرنا جس میں کسی طالبعلم کا سال ضائع نہ ہو قابل تحسین ہے۔اجلاس میں پاکستان انجنیئرنگ کونسل (پی ای سی)، انجنیئرنگ یونیورسٹیز کے وی سیز، اور ہائر ایجوکیشن کمیشن (ایچ ای سی) کے عہدے دار شریک ہوئے۔
207
