ایلیٹ فورم نے سعودی قومی دن ریاض اور الخبر میں شایانِ شان طریقے سے منایا

الخبر سعودی عرب رپورٹ جویریہ اسد:پی این پی نیوز ایچ ڈی

ایلیٹ فورم کے زیرِ اہتمام سعودی قومی دن کی تقریبات ریاض اور الخبر میں بیک وقت منعقد ہوئیں جن میں دونوں شہروں سے بڑی تعداد میں شرکاء نے جوش و خروش کے ساتھ شرکت کی۔ یہ تقاریب ملی جذبے، یکجہتی اور ثقافتی ہم آہنگی کا عملی مظہر ثابت ہوئیں۔

ریاض میں تقریب کی میزبانی ایلیٹ فورم کی بانی انجینئر جویریہ اسد نے کی، جن کے ساتھ ٹیم ممبران نبیہ انور اور نبیہ اسد شریک تھیں۔ جویریہ اسد نے اپنے خطاب میں ایلیٹ فورم کے وژن اور مشن پر روشنی ڈالی اور بتایا کہ فورم 2013 سے کمیونٹی کی سماجی، تعلیمی، کاروباری اور پیشہ ورانہ ترقی کے لیے سرگرم عمل ہے۔ اس موقع پر ممتاز مذہبی اسکالر محترمہ فائزہ عمر نے اتحاد اور ہم آہنگی کی اہمیت پر مفصل خطاب کیا۔

الخبر میں تقریب کی قیادت برانچ ہیڈ سعدیہ تجمل نے کی، جن کے ساتھ کوآرڈینیٹرز حنا تنویر اور یوہی سلطانہ شامل تھیں۔ خصوصی مہمانوں میں محترمہ ثمینہ ہاشمی (پرنسپل لٹل اسٹار پائینیئرز) اور محترمہ صدف احسان (سینئر ٹیچر، پاکستانی اسکول الخبر) شامل تھیں، جنہوں نے موقع کی مناسبت سے اپنے خیالات کا اظہار کیا۔

دونوں تقریبات میں بچوں کے لیے خصوصی کڈز کارنر بنایا گیا، جہاں ننھے شرکاء نے تخلیقی سرگرمیوں سے لطف اندوز ہوتے ہوئے سعودی ثقافتی پریڈ میں بھی حصہ لیا۔

تقریبات کے اختتام پر شرکاء نے سعودی عرب سے اپنی محبت اور وابستگی کا اظہار کیا اور ملی جذبے کے ساتھ قومی دن کی خوشیوں کو یادگار بنایا۔