ڈاکٹر سمیرہ عزیز کی میزبانی میں جدہ میں یومِ خواتین کے موقع پر اجلاس

جدہ رپورٹ ثناء شعیب :پی این نیوز ایچ ڈی

عالمی یومِ خواتین 2026 کے موقع پر جدہ میں سعودی میڈیا شخصیت اور بزنس وومن ڈاکٹر سمیرہ عزیزکے دفتر میں خواتین کے لیے خصوصی نشست “Give to Gain – Women’s Tea Talk” کا انعقاد کیا گیا۔ اس غیر رسمی ملاقات کا مقصد مختلف پس منظر سے تعلق رکھنے والی خواتین کو ایک ایسا پلیٹ فارم فراہم کرنا تھا جہاں وہ باہمی گفتگو، نیٹ ورکنگ اور حوصلہ افزائی کے ذریعے ایک دوسرے سے سیکھ سکیں اور اپنے تجربات کا تبادلہ کر سکیں.

تقریب سے خطاب کرتے ہوئے ڈاکٹر سمیرہ عزیز نے مملکت میں خواتین کی نمایاں پیش رفت کو سراہا۔ انہوں نے کہا
سعودی عرب میں ہم ایک غیر معمولی مثبت تبدیلی کا مشاہدہ کر رہے ہیں۔ ہماری ملکی قیادت اور ویژن 2030 کے تحت خواتین کاروبار، میڈیا، کھیل، ہوا بازی، ٹیکنالوجی، کاروباری سرگرمیوں اور دیگر کئی شعبوں میں فعال کردار ادا کر رہی ہیں۔

یہ دیکھنا انتہائی حوصلہ افزا ہے کہ سعودی خواتین اعتماد کے ساتھ مملکت کی ترقی اور مستقبل کے لیے ہمہ جہت ہیں ۔
تقریب کے مرکزی خیال #GiveToGain کے بارے میں گفتگو کرتے ہوئے ڈاکٹر سمیرہ عزیز نے کہا کہ یہ تصور خواتین کے درمیان فراخ دلی، باہمی تعاون اور خودمختاری کا مضبوط پیغام دیتا ہے۔

انہوں نے کہا زندگی میں اکثر ہم سمجھتے ہیں کہ کامیابی ہمیں وہ چیزیں دیتی ہیں جو ہم حاصل کرتے ہیں، لیکن حقیقت یہ ہے کہ سب سے بڑی کامیابی اکثر اس چیز سے ملتی ہے جو ہم دوسروں کو دیتے ہیں۔ کبھی کبھی سب سے بڑی حوصلہ افزائی اس وقت ملتی ہے جب ایک عورت دوسری عورت سے کہتی ہے: "میں تم پر یقین رکھتی ہوں، آگے بڑھتی رہو.

اسی لیے ہم نے اس عالمی یومِ خواتین کو ایک دوستانہ "ٹی ٹاک” کے ذریعے منانے کا فیصلہ کیا، تاکہ خواتین کو سننے، اپنے خیالات کے اظہار اور غیر رسمی گفتگو کے ذریعے تجربات کے تبادلے کا موقع فراہم کیا جا سکے۔

اس نشست کی میزبانی میں سانتھی ملیش، أریج اسکندر اور ریم اسکندر نے معاونت کی۔ دفتر کے آڈیٹوریم میں منعقد ہونے والی اس ملاقات میں شرکاء کے لیے چائے، کافی، سموسے اور بریانی کا اہتمام کیا گیا، جبکہ ماحول کو اس طرح ترتیب دیا گیا تھا کہ خواتین آپس میں رابطے، گفتگو اور باہمی حوصلہ افزائی کے ذریعے ایک دوسرے سے استفادہ کر سکیں.

تقریب کے آغاز میں دھانو ہسینی نے عالمی یومِ خواتین کے پس منظر پر روشنی ڈالتے ہوئے کہا عالمی یومِ خواتین ہر سال 8 مارچ کو دنیا بھر میں منایا جاتا ہے، جس کا مقصد خواتین کی کامیابیوں کو اجاگر کرنا اور معاشرے میں صنفی مساوات کو فروغ دینا ہے۔ اس عالمی تحریک کی حمایت دنیا بھر کی تنظیمیں، کمیونٹیز اور ادارے کرتے ہیں جو خواتین کی شمولیت، قیادت اور خود مختاری کو فروغ دینے کے لیے کام کر رہے ہیں.

انہوں نے مزید کہا کہ اس سال عالمی سطح پر جاری مہم کا مرکزی پیغام "تمام خواتین اور بچیوں کے لیے حقوق، انصاف اور عملی اقدام” ہے، جو اس بات پر زور دیتا ہے کہ خواتین اور بچیوں کے لیے مساوی حقوق، انصاف اور عملی اقدامات کے ذریعے رکاوٹوں کو دور کیا جائے.
تقریب میں شریک خواتین نے عالمی یومِ خواتین کے روایتی رنگوں جامنی، سبز اور سفید پرمشتمل لباس زیب تن کیا۔ جامنی رنگ کو انصاف اور وقار کی علامت سمجھا جاتا ہے۔ یہ سرگرمی انٹرنیشنل ویمنز ڈے گلوبل کمیونٹی کے ساتھ باضابطہ طور پر رجسٹرڈ بھی تھی، جو اس بات کی نشاندہی کرتی ہے کہ یہ اقدام دنیا بھر میں خواتین کی کامیابیوں کو اجاگر کرنے اور مثبت سماجی سرگرمیوں کو فروغ دینے کی عالمی کوششوں کا حصہ ہے.

ڈاکٹر سمیرہ عزیز نے خواتین کو ایک پلیٹ فارم پر جمع کرنے اور باہمی رابطے و حوصلہ افزائی کے ماحول کو فروغ دینے کے اس موقع پر خوشی کا اظہار کیا۔ انہوں نے اس تقریب کے انعقاد میں تعاون کرنے والے اداروں اور افراد کا شکریہ بھی ادا کیا جن میں جی آئی او، بریانی بائٹس، لمسا کلینکس، بار بی کیو ٹونائٹ، ایونٹ 7 پروڈکشن، ایکسپو اور سمیرہ عزیز ویمنز کرکٹ ٹیم شامل ہیں۔ ان اداروں کی نیک نیتی اور تعاون کمیونٹی کی سطح پر خواتین کی حوصلہ افزائی کے بڑھتے ہوئے رجحان کی عکاسی کرتا ہے.

منتظمین نے امید ظاہر کی کہ اس طرح کی ملاقاتیں خواتین کے درمیان روابط کو مزید مضبوط بنائیں گی اور عالمی یومِ خواتین کے اس پیغام کو تقویت دیں گی جو دنیا بھر میں خواتین کی کامیابیوں، استقامت اور صلاحیتوں کو تسلیم کرنے کی ترغیب دیتا ہے.