صحرائے چولستان میں رفتار کا میلہ سج گیا، 21ویں ڈیزرٹ جیپ ریلی کا آغاز

اسٹاف رپورٹ :پی این نیوز ایچ ڈی

صحرائے چولستان ایک بار پھر انجنوں کی گرج اور رفتار کے سنسنی خیز مقابلوں سے گونج اٹھے گا، جہاں 21ویں انٹرنیشنل چولستان ڈیزرٹ جیپ ریلی کا باقاعدہ آغاز آج سے ہو رہا ہے۔ یہ دلچسپ اور سنسنی خیز مقابلے 15 فروری تک جاری رہیں گے۔

انتظامیہ کے مطابق ایونٹ میں ملکی و غیر ملکی ریسرز شرکت کر رہے ہیں جو صحرائی ٹریک پر اپنی ڈرائیونگ مہارت کا مظاہرہ کریں گے۔ ریس ٹریک کو مکمل طور پر کلیئر کر دیا گیا ہے جبکہ شرکاء اور شائقین کی سہولت کے لیے تمام انتظامات مکمل کر لیے گئے ہیں۔

ترجمان پولیس کے مطابق ایونٹ کے لیے جامع اور فول پروف سیکیورٹی پلان ترتیب دیا گیا ہے۔ دو ہزار سے زائد پولیس اہلکار سیکیورٹی ڈیوٹی انجام دیں گے تاکہ ملکی و غیر ملکی سیاحوں اور ریسرز کی حفاظت کو یقینی بنایا جا سکے۔ ٹریفک کی روانی برقرار رکھنے کے لیے ڈی ایس پی ٹریفک کی نگرانی میں 400 اہلکار تعینات ہوں گے۔

کسی بھی ہنگامی صورتحال سے نمٹنے کے لیے موبائل فیلڈ اسپتال اور 4×4 ایمبولینسز کو بھی الرٹ رکھا گیا ہے تاکہ فوری طبی امداد فراہم کی جا سکے۔

چولستان ڈیزرٹ جیپ ریلی کے موقع پر ثقافتی پروگرامز بھی منعقد کیے جائیں گے، جہاں مقامی موسیقی، روایتی رقص اور علاقائی ثقافت کی جھلک پیش کی جائے گی۔ ماہرین کے مطابق یہ ایونٹ نہ صرف موٹر اسپورٹس کا بڑا مقابلہ ہے بلکہ سیاحت، مقامی معیشت اور ثقافتی سرگرمیوں کے فروغ کا بھی اہم ذریعہ ثابت ہو رہا ہے۔