پی آئی اے کا ایک اور کارنامہ، ملتان کے حجاج کو جدہ ایئرپورٹ پر چھوڑ کر پرواز روانہ، شدید احتجاج

اسٹاف رپورٹ : پی این پی نیوز ایچ ڈی

قومی فضائی کمپنی پاکستان انٹرنیشنل ایئر لائنز (پی آئی اے) کی انتظامی غفلت ایک بار پھر سامنے آگئی، جب جدہ سے ملتان جانے والی پرواز پی کے 846 متعدد حجاج کرام کو ایئرپورٹ پر چھوڑ کر روانہ ہوگئی، جس کے بعد متاثرہ مسافروں نے شدید احتجاج کیا.

متاثرہ حجاج کرام کے مطابق ان کے پاس جدہ سے ملتان جانے والی پرواز PK-846 کی کنفرم ٹکٹیں موجود تھیں اور وہ مقررہ وقت سے تقریباً دو گھنٹے قبل جدہ ایئرپورٹ پہنچ گئے تھے , تاہم بورڈنگ کے دوران اچانک انہیں جہاز میں سوار ہونے سے روک دیا گیا اور بعد ازاں پرواز ان کے بغیر ہی روانہ ہوگئی.

مسافروں کا کہنا ہے کہ ان میں خواتین، بزرگ اور دیگر حجاج بھی شامل ہیں جو حج کی ادائیگی کے بعد وطن واپسی کے منتظر تھے۔ متاثرین نے الزام عائد کیا کہ ایئرلائن انتظامیہ کی جانب سے نہ تو مناسب رہنمائی فراہم کی گئی اور نہ ہی ان کے سفر کے متبادل انتظامات کے بارے میں کوئی واضح معلومات دی گئیں.

جدہ ایئرپورٹ پر احتجاج کرنے والے حجاج کرام نے شدید ناراضگی کا اظہار کرتے ہوئے کہا کہ وہ بے یار و مددگار ایئرپورٹ پر کھڑے ہیں اور انہیں شدید ذہنی اذیت کا سامنا ہے۔ خواتین حجاج نے بھی انتظامیہ کے رویے پر تحفظات کا اظہار کرتے ہوئے فوری کارروائی اور وطن واپسی کے انتظامات کا مطالبہ کیا.

دوسری جانب واقعے کے حوالے سے پی آئی اے کی جانب سے فوری طور پر کوئی باضابطہ مؤقف سامنے نہیں آیا، تاہم متاثرہ مسافروں نے حکومت پاکستان، وزارتِ ہوا بازی اور متعلقہ حکام سے مطالبہ کیا ہے کہ معاملے کی تحقیقات کرکے ذمہ داروں کا تعین کیا جائے اور انہیں جلد از جلد پاکستان پہنچانے کے انتظامات کیے جائیں.

یہ واقعہ ایک ایسے وقت میں پیش آیا ہے جب حج آپریشن اپنے اختتامی مراحل میں داخل ہو چکا ہے اور ہزاروں پاکستانی حجاج وطن واپس لوٹ رہے ہیں، جس کے باعث قومی ایئرلائن کی کارکردگی ایک بار پھر سوالات کی زد میں آ گئی ہے.