خصوصی افراد کے لیے امید کی نئی کرن، نور مسکن منصوبے کا باضابطہ آغاز
رپورٹ نمیرہ محسن :پی این نیوز ایچ ڈی
ساحلی شہر الخبر میں ہم مشعلِ راہ فاؤنڈیشن کے زیرِ اہتمام ایک پروقار تعارفی تقریب کا انعقاد کیا گیا جس میں فاؤنڈیشن کی جانب سے تاریخی منصوبے “نورِ مسکن” کا باضابطہ اعلان کیا گیا۔ اس منصوبے کو خصوصی افراد اور عصبی تنوع رکھنے والے بالغ افراد کے لیے ایک انقلابی قدم قرار دیا جا رہا ہے.
تقریب میں بانی و ڈائریکٹر ہم مشعلِ راہ فاؤنڈیشن محترمہ آمنہ آفتاب، معاون بانی و صدر محترمہ اریج فاروق، جبکہ اڈیپٹ وومن کلب برائے خواتین سعودی عرب کی بانی و چیئرپرسن اور ماہرِ نفسیات محترمہ سیدہ نمیرہ محسن نے خصوصی خطاب کیا۔ اس موقع پر ڈاکٹر علی چوہدری اور مہمانِ خصوصی ڈاکٹر حلیم حامد رضوی بھی موجود تھے.
تقریب کا آغاز تلاوتِ کلامِ پاک اور اس کے ترجمے سے محمد چوہدری نے کیا، جس کے بعد ڈائریکٹر آمنہ آفتاب نے اپنے خطاب میں فاؤنڈیشن کے قیام کا پس منظر بیان کرتے ہوئے بتایا کہ نورِ مسکن دراصل اُن خاندانوں کی دیرینہ ضرورت کا جواب ہے جو خصوصی افراد کی دیکھ بھال کے لیے محفوظ، باوقار اور سائنسی بنیادوں پر قائم ادارے کے منتظر تھے.
صدر اریج فاروق نے اپنے خطاب میں کہا کہ یہ منصوبہ صرف ایک نرسنگ ہوم نہیں بلکہ ایک ایسا مرکز ہوگا جہاں عصبی تنوع رکھنے والے بالغ افراد، بستر سے لگے مریض، ڈیمنشیا اور الزائمر کے شکار افراد کو جدید سہولیات کے ساتھ نگہداشت فراہم کی جائے گی۔ انہوں نے کہا کہ “نورِ مسکن” پاکستان کا پہلا ایسا جامع نرسنگ ہوم ہوگا جس میں جدید ریسرچ سینٹر بھی قائم کیا جائے گا تاکہ تحقیق اور عملی خدمات کو یکجا کیا جا سکے.
سیدہ نمیرہ محسن نے خصوصی افراد کی ذہنی و نفسیاتی ضروریات پر روشنی ڈالتے ہوئے کہا کہ معاشرے میں شمولیتی سوچ کو فروغ دینا وقت کی اہم ضرورت ہے اور “نورِ مسکن” اسی سوچ کی عملی تصویر ہے.
تقریب کے اختتام پر قائدین اور فرینڈز آف ہم مشعلِ راہ نے مل کر “نورِ مسکن” کی گراؤنڈ بریکنگ تقریب انجام دی۔ اس موقع پر حماد چوہدری اور دیگر خصوصی بچوں کی شرکت نے تقریب کو مزید باوقار بنا دیا۔ شرکاء نے اس منصوبے کو ’’وقت کی اہم ضرورت‘‘ قرار دیتے ہوئے اس اقدام کو سراہا اور امید ظاہر کی کہ یہ منصوبہ پاکستان میں خصوصی افراد کی نگہداشت کے معیار کو نئی جہت دے گا.
“نورِ مسکن” کو خصوصی افراد اور اُن کے اہلِ خانہ کے لیے ایک محفوظ پناہ گاہ اور باعزت زندگی کی ضمانت کے طور پر دیکھا جا رہا ہے، جو سماجی خدمت کے میدان میں ایک سنگِ میل ثابت ہو سکتا ہے.
