قازقستان کے صدر کے اعزاز میں وزیراعظم ہاؤس میں پروقار استقبالیہ، گارڈ آف آنر پیش

اسٹاف رپورٹ :پی این نیوز ایچ ڈی

قازقستان کے صدر قاسم جومارت توکایووف کے اعزاز میں وزیراعظم ہاؤس اسلام آباد میں ایک پروقار استقبالیہ تقریب منعقد کی گئی، جہاں انہیں مسلح افواج کے چاق و چوبند دستے کی جانب سے گارڈ آف آنر پیش کیا گیا.

وزیراعظم ہاؤس آمد پر وزیراعظم محمد شہباز شریف نے معزز مہمان کا پرتپاک استقبال کیا۔ دونوں رہنماؤں کے درمیان مصافحہ ہوا اور خوشگوار جملوں کا تبادلہ کیا گیا۔ تقریب کے آغاز پر پاکستان اور قازقستان کے قومی ترانے بجائے گئے، جس کے بعد مسلح افواج کے دستے نے صدر قازقستان کو گارڈ آف آنر پیش کیا.

اس موقع پر وزیراعظم شہباز شریف نے قازقستان کے صدر کو وفاقی کابینہ کے ارکان سے متعارف کرایا، جبکہ صدر قاسم جومارت توکایووف نے بھی اپنے وفد کا وزیراعظم سے تعارف کرایا۔ بعد ازاں صدر قازقستان نے وزیراعظم ہاؤس کے احاطے میں یادگاری پودا بھی لگایا.

یاد رہے کہ قازقستان کے صدر قاسم جومارت توکایووف وزیراعظم محمد شہباز شریف کی دعوت پر سرکاری دورے پر پاکستان آئے ہیں۔ اس سے قبل صدر قازقستان کی پاکستان آمد پر نور خان ایئر بیس پر انہیں 21 توپوں کی سلامی دی گئی، جبکہ پاک فضائیہ کے لڑاکا طیاروں نے فضاء میں سلامی پیش کی۔ پاکستانی فضائی حدود میں داخل ہوتے ہی جنگی طیاروں نے قازقستان کے صدر کے طیارے کو حفاظتی حصار میں لے لیا تھا.

یہ دورہ پاکستان اور قازقستان کے درمیان دوطرفہ تعلقات، اقتصادی تعاون اور علاقائی روابط کے فروغ میں اہم پیش رفت قرار دیا جا رہا ہے.