سابق وزیراعظم عمران خان سے آج ملاقات کا دن، چھ وکلا کے نام جیل حکام کو ارسال
اسٹاف رپورٹ : پی این پی نیوز ایچ ڈی
سابق وزیراعظم اور پاکستان تحریک انصاف (پی ٹی آئی) کے بانی عمران خان سے آج اڈیالہ جیل میں ملاقات کا دن ہے، جس کے لیے پارٹی قیادت کی جانب سے چھ وکلا کے ناموں پر مشتمل فہرست جیل انتظامیہ کو بھجوا دی گئی ہے.
ذرائع کے مطابق ملاقات کے لیے جن وکلا کے نام جیل حکام کو فراہم کیے گئے ہیں ان میں پی ٹی آئی کے چیئرمین بیرسٹر گوہر علی خان، انتظار حسین پنجوتھہ، علی زمان، فیصل ملک، حنا جاوید اور اویس یونس چودھری شامل ہیں۔ توقع ہے کہ وکلا کی ٹیم سابق وزیراعظم عمران خان سے جاری قانونی معاملات، عدالتی کیسز اور پارٹی امور پر مشاورت کرے گی.
ذرائع کا کہنا ہے کہ عمران خان کی بہنیں بھی آج اڈیالہ جیل میں ان سے ملاقات کے لیے آئیں گی۔ ملاقات کے دوران ان کی خیریت دریافت کرنے کے علاوہ خاندانی معاملات پر بھی گفتگو متوقع ہے.
پی ٹی آئی رہنماؤں کے مطابق پارٹی کی سیاسی حکمت عملی، تنظیمی معاملات اور آئندہ کے لائحہ عمل سے متعلق امور بھی ملاقات کے دوران زیر غور آ سکتے ہیں۔ دوسری جانب جیل انتظامیہ کی جانب سے ملاقاتوں کے لیے مقررہ ضابطہ کار کے مطابق انتظامات مکمل کر لیے گئے ہیں.
واضح رہے کہ سابق وزیراعظم عمران خان مختلف مقدمات کے سلسلے میں اڈیالہ جیل میں قید ہیں، جبکہ ان سے وکلا، اہل خانہ اور پارٹی رہنماؤں کی ملاقاتیں عدالتی احکامات اور جیل قوانین کے تحت طے شدہ شیڈول کے مطابق کرائی جاتی ہیں.
مزید پیش رفت اور ملاقات کے بعد سامنے آنے والی تفصیلات کا انتظار کیا جا رہا ہے.
