پاکستان انٹرنیشنل اسکول ریاض میں نئے ایکٹنگ پرنسپل کی تعیناتی
عالم خان مہمند ریاض سعودی،عرب : پی این پی نیوز ایچ ڈی
پاکستان انٹرنیشنل اسکول ریاض (PISR) کی اسکول مینجمنٹ کونسل نے ادارے کے سینئر، تجربہ کار اور قابلِ اعتماد تعلیمی رہنما پروفیسر انوارالحق کو اسکول کا ایکٹنگ پرنسپل مقرر کر دیا ہے.
اس موقع پر اسکول مینجمنٹ کونسل کے چیئرمین ڈاکٹر محمد آصف نے پروفیسر انوارالحق کو نئی ذمہ داری سنبھالنے پر مبارکباد پیش کرتے ہوئے امید ظاہر کی کہ وہ اپنی پیشہ ورانہ صلاحیتوں، محنت اور خلوص کے ذریعے تعلیمی معیار کو مزید بہتر بنانے اور پاکستانی کمیونٹی کی خدمت کے مشن کو جاری رکھیں گے.
ریاض میں مقیم پاکستانی کمیونٹی نے بھی پروفیسر انوارالحق کی تعیناتی کا خیرمقدم کرتے ہوئے ان پر اپنے بھرپور اعتماد کا اظہار کیا ہے۔ کمیونٹی اراکین کا کہنا ہے کہ ان کی تعلیمی خدمات اور انتظامی تجربہ اسکول کی مزید ترقی میں اہم کردار ادا کرے گا.
میڈیا سے گفتگو کرتے ہوئے پروفیسر انوارالحق نے کہا کہ وہ اپنی تمام تر توانائیاں اسکول کی بہتری، تعلیمی نتائج میں نمایاں اضافہ اور طلبہ کے روشن مستقبل کے لیے وقف کریں گے۔ انہوں نے اس عزم کا اظہار کیا کہ والدین اور اسکول انتظامیہ کے درمیان مضبوط رابطے کو فروغ دیا جائے گا.
انہوں نے کہا کہ والدین کے لیے ان کے دروازے چوبیس گھنٹے کھلے رہیں گے اور وہ ہر ممکن تعاون کے ذریعے طلبہ، اساتذہ اور والدین کے مسائل کے حل کو یقینی بنائیں گے۔ ان کا کہنا تھا کہ اجتماعی کاوشوں اور مثبت حکمت عملی کے ذریعے پاکستان انٹرنیشنل اسکول ریاض کو مزید کامیابیوں کی جانب گامزن کیا جائے گا.
