ہمبرگ میں پاکستانی کمیونٹی کی جانب سے عید الاضحیٰ میلن پارٹی، سفارتی و سیاسی شخصیات کی شرکت
جرمنی خصوصی رپورٹ مطیع اللہ: پی این پی نیوز ایچ ڈی
جرمنی کے شہر ہمبرگ میں پاکستانی کمیونٹی کی جانب سے عید الاضحیٰ کے موقع پر ایک شاندار عید میلن پارٹی کا انعقاد کیا گیا، جس میں پاکستانی کمیونٹی کے افراد، سماجی شخصیات اور معزز مہمانوں نے بڑی تعداد میں شرکت کی.
تقریب کی سرپرستی پاکستانی کمیونٹی ہمبرگ کے صدر اور جرمنی کے کوآرڈینیٹر جہانگیر سلیم نے کی، جبکہ سیکرٹری عامر رانا محمود، نائب صدر فرید شاہ اور چیئرمین رانا جاوید سرور نے انتظامات میں بھرپور کردار ادا کیا.
پروگرام کا آغاز بچوں پارس سلیم اور نحل سلیم کی دلنشین تلاوتِ قرآن پاک سے ہوا۔ حاضرین کی خصوصی فرمائش پر دونوں بچوں نے قصیدہ بردہ شریف بھی پیش کیا جسے شرکاء نے بے حد سراہا۔ بعد ازاں عامر رانا محمود اور حافظ عظیم نے بارگاہِ رسالت مآب ﷺ میں عقیدت کے پھول نچھاور کرتے ہوئے نعتِ رسولِ مقبول ﷺ پیش کی.
تقریب سے خطاب کرتے ہوئے غنظفر بھائی نے عید الاضحیٰ کی اہمیت، قربانی کے فلسفے اور اس کے معاشرتی اثرات پر روشنی ڈالی۔ اس موقع پر برلن سے تشریف لانے والے قائم مقام سفیر محمد رمان احمد نے خصوصی شرکت کی۔ شرکاء نے ان کا پرتپاک استقبال کیا۔ اپنے خطاب میں انہوں نے جرمنی میں مقیم پاکستانیوں کے مثبت کردار، اتحاد، بھائی چارے اور باہمی تعاون کی اہمیت پر زور دیا اور کمیونٹی کی سرگرمیوں کو سراہتے ہوئے آئندہ بھی ایسی تقریبات میں شرکت کی خواہش کا اظہار کیا.
تقریب میں ہمبرگ سے تعلق رکھنے والے SPD پارٹی کے پارلیمانی رکن گلفام ملک نے بھی شرکت کی اور پاکستانی کمیونٹی کی سماجی و ثقافتی سرگرمیوں کو قابلِ ستائش قرار دیا.
مہمانوں کے اعزاز میں پرتکلف عشائیے کا اہتمام کیا گیا، جس سے شرکاء نے بھرپور لطف اٹھایا۔ ثقافتی پروگرام کے دوران رویندر سنگھ اور ان کی اہلیہ نے روایتی پنجابی بھنگڑا پیش کرکے محفل کو خوب گرمایا، جبکہ پاکستان سے آئے معروف گلوکار وکی چوہدری نے اپنے فن کا شاندار مظاہرہ کرتے ہوئے حاضرین کو محظوظ کیا۔ ڈھول کی تھاپ، پنجابی موسیقی اور روایتی رقص نے تقریب کو یادگار بنا دیا.
تقریب خوشگوار ماحول، باہمی محبت، اتحاد اور بھائی چارے کے پیغام کے ساتھ اختتام پذیر ہوئی۔ شرکاء نے اس عزم کا اظہار کیا کہ وہ مستقبل میں بھی اپنی ثقافت، روایات اور قومی یکجہتی کے فروغ کے لیے اسی جذبے کے ساتھ مل کر کام کرتے رہیں گے.
