پاکستان سٹاک مارکیٹ میں ٹریڈنگ کا منفی زون میں آغاز
اسٹاف رپورٹ : پی این پی نیوز ایچ ڈی
پاکستان سٹاک ایکسچینج میں کاروباری ہفتے کے تیسرے روز مندی کا رجحان دیکھنے میں آیا، جہاں سرمایہ کاروں کی جانب سے محتاط رویہ اختیار کیے جانے کے باعث مارکیٹ کا آغاز منفی زون میں ہوا۔ ابتدائی ٹریڈنگ کے دوران بینچ مارک کے ایس ای-100 انڈیکس میں 1000 سے زائد پوائنٹس کی نمایاں کمی ریکارڈ کی گئی.
مارکیٹ ذرائع کے مطابق کاروبار کے آغاز پر فروخت کے دباؤ میں اضافے کے باعث ہنڈرڈ انڈیکس ایک لاکھ 69 ہزار 932 پوائنٹس کی سطح تک گر گیا۔ سرمایہ کاروں کی جانب سے منافع کے حصول، معاشی اشاریوں پر نظر اور عالمی مارکیٹوں میں اتار چڑھاؤ کے اثرات مقامی مارکیٹ کی کارکردگی پر نمایاں رہے.
واضح رہے کہ گزشتہ کاروباری روز پاکستان سٹاک ایکسچینج میں مثبت رجحان دیکھنے میں آیا تھا اور کاروبار کے اختتام پر کے ایس ای-100 انڈیکس 421 پوائنٹس کے اضافے کے ساتھ ایک لاکھ 71 ہزار 21 پوائنٹس کی سطح پر بند ہوا تھا۔ تاہم نئے کاروباری دن کے آغاز پر مارکیٹ اپنی یہ رفتار برقرار نہ رکھ سکی اور سرمایہ کاروں نے محتاط حکمت عملی اختیار کی.
معاشی ماہرین کے مطابق سٹاک مارکیٹ میں مختصر مدتی مندی کی ایک وجہ سرمایہ کاروں کا منافع سمیٹنے کا رجحان بھی ہوسکتا ہے، جبکہ ملکی معاشی پالیسیوں، شرح سود اور بجٹ سے متعلق توقعات بھی مارکیٹ کے رویے پر اثر انداز ہو رہی ہیں.
دوسری جانب ایشیائی سٹاک مارکیٹس میں مجموعی طور پر مثبت رجحان دیکھا گیا۔ بین الاقوامی خبر ایجنسی کے مطابق جاپان کے نکی انڈیکس میں تقریباً 3 فیصد کا نمایاں اضافہ ریکارڈ کیا گیا، جسے خطے کی بڑی مارکیٹوں میں بہترین کارکردگی قرار دیا جا رہا ہے.
اسی طرح تائیوان کے ایس ای انڈیکس میں 2 فیصد اضافہ ہوا، جبکہ تھائی لینڈ کے سیٹ انڈیکس اور انڈونیشیا کے جکارتہ کمپوزٹ انڈیکس میں بھی ایک فیصد سے زائد بہتری دیکھی گئی۔ چین اور ملائیشیا کی سٹاک مارکیٹس میں معمولی تیزی ریکارڈ کی گئی، جو سرمایہ کاروں کے اعتماد کی عکاسی کرتی ہے.
تاہم ہانگ کانگ کی سٹاک مارکیٹ میں صورتحال مختلف رہی، جہاں ہینگ سینگ انڈیکس تقریباً 2 فیصد کمی کے ساتھ منفی زون میں رہا۔ تجزیہ کاروں کا کہنا ہے کہ عالمی معاشی غیر یقینی صورتحال، تجارتی پالیسیوں اور سرمایہ کاروں کے محتاط رویے کے باعث مختلف ایشیائی مارکیٹوں کی کارکردگی میں فرق دیکھا جا رہا ہے.
ماہرین کا کہنا ہے کہ پاکستان سٹاک مارکیٹ کی آئندہ سمت کا انحصار معاشی اعداد و شمار، بجٹ سے متعلق اعلانات، سرمایہ کاروں کے اعتماد اور عالمی مالیاتی رجحانات پر ہوگا۔ سرمایہ کاروں کی نظریں اب دن بھر کی ٹریڈنگ اور حکومتی معاشی پالیسیوں سے متعلق پیش رفت پر مرکوز ہیں.
