جدہ میں لیڈیز عید گالا، خواتین کی صلاحیتوں اور کاروباری کردار کو اجاگر کرنے کی شاندار تقریب
جدہ رپورٹ ثناء شعیب : پی این پی نیوز ایچ ڈی
جدہ کے علاقے الرحاب میں عید کی خوشیوں کو دوبالا کرنے اور خواتین کے بااختیار کردار کو اجاگر کرنے کے لیے ایک شاندار لیڈیز عید گالا کا انعقاد کیا گیا.اس خوبصورت تقریب کا مقصد خواتین کو ایک ایسا پلیٹ فارم فراہم کرنا تھا جہاں وہ خریداری، تفریح، باہمی رابطے اور اپنی کاروباری صلاحیتوں کے اظہار کے ذریعے ویمن امپاورمنٹ کو مزید فروغ دے سکیں.
تقریب کی چیف گیسٹ ڈاکٹر سمیرا عزیز تھیں، جبکہ گیسٹ آف آنر سعدیہ وقار، ڈپٹی قونصل جنرل پاکستان نے خصوصی شرکت کی۔ تقریب کی میزبانی ڈاکٹر رخشندہ پوری نے انجام دی.
اپنے خطاب میں ڈاکٹر سمیرا عزیز نے کہا کہ خواتین کو معاشی اور سماجی طور پر مضبوط بنانا ایک ترقی یافتہ معاشرے کی بنیاد ہے، اور اس نوعیت کی تقریبات خواتین کو اپنی صلاحیتیں منوانے کے بہترین مواقع فراہم کرتی ہیں.
سعدیہ وقار، ڈپٹی قونصل جنرل پاکستان نے اپنے خطاب میں کہا کہ پاکستانی خواتین دنیا بھر میں اپنی قابلیت اور محنت سے نمایاں مقام حاصل کر رہی ہیں، اور ایسے ایونٹس خواتین کے اعتماد اور خودمختاری کو مزید مستحکم کرتے ہیں.
تقریب کو کامیاب بنانے میں مس طیبہ، ماہین سپرا، سوریہ جبین، حرا مریم بادی، روبیلا جمیل اور کرن معراج نے انتوڑ محنت کی اور ان کی کاوشوں کو دیگر خواتین نے بھی سراہا.
عید گالا کی خاص بات مختلف برانڈز اور خواتین کاروباری شخصیات کے اسٹالز تھے، جہاں ملبوسات، جیولری، ہینڈی کرافٹس، گھریلو مصنوعات، بیکری آئٹمز اور دیگر دلکش اشیاء پیش کی گئیں تاکہ خواتین اور بچیاں اپنی پسند کی خریداری کر سکیں۔ ان اسٹالز نے نہ صرف شرکاء کی بھرپور توجہ حاصل کی بلکہ خواتین کے کاروبار کو فروغ دینے اور ویمن امپاورمنٹ کو مزید تقویت دینے میں اہم کردار ادا کیا.
شرکاء نے اس عزم کا اظہار کیا کہ مستقبل میں بھی اس طرح کی تقریبات کا انعقاد جاری رکھا جائے گا تاکہ خواتین کو ترقی، خوداعتمادی اور معاشی استحکام کے مزید مواقع فراہم کیے جا سکیں.
تقریب خوشگوار ماحول، خریداری، تفریح اور عید کی خوشیوں کے ساتھ اختتام پذیر ہوئی اور اسے خواتین کے لیے ایک کامیاب اور یادگار اقدام قرار دیا گیا.
