جدہ میں معرکہ حق بنیان مرصوص کی پہلی سالگرہ پر پروقار تقریب
جدہ رپورٹ نمائندہ خصوصی : مریم شاہد پی این پی نیوز ایچ ڈی
سعودی عرب کے شہر جدہ میں معرکہ حق بنیان مرصوص کی ایک سالہ تکمیل کے موقع پر پاکستان قونصلیٹ جدہ میں ایک پروقار تقریب کا انعقاد کیا گیا، جس میں پاکستانی کمیونٹی کے مختلف مکاتبِ فکر سے تعلق رکھنے والے افراد نے بڑی تعداد میں شرکت کی۔ شرکاء نے افواجِ پاکستان کی تاریخی کامیابی اور وطن کے دفاع میں دی گئی قربانیوں کو زبردست خراجِ تحسین پیش کیا.
تقریب کے دوران مقررین نے کہا کہ افواجِ پاکستان نے مختصر وقت میں دشمن کی جارحیت کا مؤثر جواب دے کر نہ صرف ملک کا دفاع یقینی بنایا بلکہ دنیا کو یہ پیغام بھی دیا کہ پاکستان اپنی سالمیت پر کسی قسم کا سمجھوتہ نہیں کرے گا۔ شرکاء نے اس موقع پر فیلڈ مارشل سید عاصم منیر کی قیادت کو سراہتے ہوئے ان کی درازیٔ عمر، پاکستان کی سلامتی اور ترقی کے لیے خصوصی دعائیں کیں.
تقریب سے خطاب کرتے ہوئے کشمیر کمیٹی کے چیئرمین مسعود احمد پوری نے کہا کہ پاکستانی افواج کی بہادری کو دنیا ہمیشہ یاد رکھے گی۔ انہوں نے کہا کہ نام نہاد بڑی طاقت کی جارحیت کو پاکستان نے مؤثر انداز میں ناکام بنا کر اسے جھکنے پر مجبور کر دیا.
چیئرمین پاک کشمیر کمیونٹی انجینئر عارف مغل نے اپنے خطاب میں کہا کہ پاکستان کی مضبوط عسکری قیادت اور کامیاب خارجہ پالیسی نے کشمیری عوام کے حوصلے بلند کیے ہیں اور انہیں یقین ہے کہ کشمیر کی آزادی کی جدوجہد ایک دن ضرور کامیاب ہوگی.
او آئی سی میں پاکستانی مندوب سفیر فواد شیر نے کہا کہ بھارت نے جارحیت کا راستہ اختیار کیا جبکہ پاکستان نے عالمی قوانین کے تحت اپنا دفاع کیا۔ انہوں نے کہا کہ بھارتی میڈیا نے دنیا کو گمراہ کرنے کی کوشش کی لیکن خود بھارت کے سنجیدہ میڈیا اداروں اور صحافیوں نے ان دعوؤں کی حقیقت بے نقاب کر دی.
تقریب کے اختتامی خطاب میں قونصل جنرل جدہ سید مصطفیٰ ربانی نے کہا کہ پاکستان کی فضائیہ اور عسکری قیادت نے “بنیان مرصوص” میں بہادری، سنجیدگی اور وطن سے محبت کی روشن مثال قائم کی۔ انہوں نے پاکستانی میڈیا کو مبارکباد دیتے ہوئے کہا کہ قومی میڈیا نے ذمہ داری کے ساتھ دنیا کو اصل صورتحال سے آگاہ کیا اور ملک کے اندر و بیرونِ ملک پاکستانیوں کے حوصلے بلند کیے.
تقریب کی نظامت ویلفیئر قونصل محترمہ اذکاء نے انجام دی۔ تقریب کے اختتام پر پاکستان کی سلامتی، شہداء کے درجات کی بلندی اور سعودی قیادت کی درازیٔ عمر کے لیے خصوصی دعا کی گئی.
