گجرات میں مبینہ پولیس فائرنگ کا واقعہ
اسٹاف رپورٹ :پی این نیوز ایچ ڈی
شہر میں پیش آنے والا ایک مبینہ پولیس کارروائی کا واقعہ عوامی حلقوں میں تشویش اور بحث کا سبب بن گیا ہے۔ اطلاعات کے مطابق دو نوجوانوں کو مبینہ طور پر ذاتی رنجش کی بنیاد پر حراست میں لیا گیا، جس کے بعد ان کی ٹانگوں پر فائرنگ کیے جانے کا دعویٰ سامنے آیا ہے.
ذرائع کا کہنا ہے کہ دونوں نوجوانوں کو پہلے مقامی تھانے منتقل کیا گیا، تاہم ابتدائی طور پر نہ تو ایف آئی آر درج کی گئی اور نہ ہی اہلِ خانہ کو فوری طور پر اطلاع دی گئی۔ اہلِ خانہ کے مطابق رات گئے درج کی جانے والی ایف آئی آر میں مؤقف اختیار کیا گیا کہ دونوں نوجوان آپس میں جھگڑے کے دوران ایک دوسرے کی فائرنگ سے زخمی ہوئے.
متاثرہ خاندان کا دعویٰ ہے کہ فائرنگ حراست کے دوران کی گئی اور بعد ازاں واقعے کو مختلف انداز میں پیش کیا گیا۔ اہلِ خانہ نے یہ بھی الزام عائد کیا ہے کہ زخمی نوجوانوں پر مخصوص بیان دینے کے لیے دباؤ ڈالا جا رہا ہے.
واضح رہے کہ زخمی ہونے والے افراد میں سے ایک کو سابق سٹی صدر پاکستان مسلم لیگ (ق) محمد حنیف حیدری کا نواسہ بتایا جا رہا ہے، جو مقامی سطح پر ایک معروف سماجی و سیاسی شخصیت سمجھے جاتے ہیں.
تاحال پولیس حکام کی جانب سے ان الزامات پر باضابطہ مؤقف سامنے نہیں آیا۔ قانونی ماہرین کا کہنا ہے کہ اگر حراست کے دوران فائرنگ یا اختیارات کے ناجائز استعمال کے الزامات درست ثابت ہوتے ہیں تو یہ نہ صرف قانون کی سنگین خلاف ورزی ہوگی بلکہ بنیادی انسانی حقوق کے بھی منافی ہے.
شہری و سماجی حلقوں نے مطالبہ کیا ہے کہ واقعے کی شفاف، غیر جانبدارانہ اور اعلیٰ سطحی تحقیقات کرائی جائیں، سی سی ٹی وی فوٹیج اور میڈیکل رپورٹس منظرِ عام پر لائی جائیں، اور اگر کسی قسم کی بدعنوانی یا اختیارات سے تجاوز ثابت ہو تو ذمہ داران کے خلاف قانون کے مطابق کارروائی عمل میں لائی جائے.
