پٹرول 5 روپے اور ہائی اسپیڈ ڈیزل 7 روپے 32 پیسے مہنگا، نئی قیمتوں کا اطلاق فوری طور پر نافذ

اسٹاف رپورٹ :پی این نیوز ایچ ڈی

حکومت نے پٹرولیم مصنوعات کی قیمتوں میں اضافہ کر دیا ہے جس کے بعد عوام پر مہنگائی کا مزید بوجھ پڑ گیا ہے۔ وزارتِ خزانہ کی منظوری کے بعد پٹرولیم ڈویژن نے نئی قیمتوں کا باضابطہ نوٹیفکیشن جاری کر دیا.

جاری کردہ اعلامیے کے مطابق پٹرول کی قیمت میں 5 روپے فی لٹر اضافہ کیا گیا ہے، جس کے بعد پٹرول کی نئی قیمت 258 روپے 17 پیسے فی لٹر مقرر کر دی گئی ہے۔ اسی طرح ہائی اسپیڈ ڈیزل کی قیمت میں 7 روپے 32 پیسے فی لٹر اضافہ کیا گیا ہے، جس کے بعد اس کی نئی قیمت 275 روپے 70 پیسے فی لٹر ہو گئی ہے.

حکومتی ذرائع کے مطابق قیمتوں میں ردوبدل عالمی منڈی میں خام تیل کی قیمتوں اور ایکسچینج ریٹ میں اتار چڑھاؤ کے باعث کیا گیا ہے۔ حکام کا کہنا ہے کہ عالمی مالیاتی دباؤ اور درآمدی لاگت میں اضافے کے باعث یہ فیصلہ ناگزیر تھا.

دوسری جانب عوامی حلقوں نے پٹرولیم مصنوعات کی قیمتوں میں اضافے پر تشویش کا اظہار کیا ہے اور کہا ہے کہ اس فیصلے سے ٹرانسپورٹ کے کرایوں اور اشیائے ضروریہ کی قیمتوں میں مزید اضافہ متوقع ہے۔ معاشی ماہرین کے مطابق ایندھن کی قیمتوں میں اضافہ مہنگائی کی مجموعی شرح پر بھی اثر انداز ہو سکتا ہے.

نئی قیمتوں کا اطلاق فوری طور پر کر دیا گیا ہے.