سلمان صفدر کی سابق وزیراعظم عمران خان سے طویل ملاقات، تفصیلی رپورٹ آج سپریم کورٹ میں پیش کی جائے گی

اسٹاف رپورٹ :پی این نیوز ایچ ڈی

سپریم کورٹ کی جانب سے فرینڈ آف دی کورٹ مقرر کیے جانے والے بانی پاکستان تحریک انصاف (پی ٹی آئی) کے وکیل بیرسٹر سلمان صفدر نے اڈیالہ جیل میں سابق وزیراعظم عمران خان سے ملاقات کر لی ہے۔ ملاقات کا دورانیہ تقریباً تین گھنٹے رہا، جس کے بعد بیرسٹر سلمان صفدر جیل سے روانہ ہو گئے۔

ذرائع کے مطابق ملاقات کے بعد بیرسٹر سلمان صفدر نے میڈیا سے باقاعدہ گفتگو سے گریز کیا، تاہم مختصر گفتگو میں انہوں نے کہا کہ عدالتی احکامات کے مطابق عمران خان تک مکمل رسائی دی گئی۔ ان کا کہنا تھا کہ سپریم کورٹ میں رپورٹ داخل کرانے سے قبل کسی قسم کا تفصیلی بیان دینا مناسب نہیں، تاہم یہ واضح ہے کہ تین گھنٹے طویل ملاقات ہوئی ہے اور عمران خان کی صحت تسلی بخش ہے۔

اطلاعات کے مطابق بیرسٹر سلمان صفدر عمران خان سے ملاقات کی تفصیلی تحریری رپورٹ آج سپریم کورٹ میں جمع کرائیں گے، جس میں بانی پی ٹی آئی کی حالتِ زار، جیل میں دستیاب سہولیات اور عدالتی احکامات پر عملدرآمد کی تفصیلات شامل ہوں گی۔

واضح رہے کہ سپریم کورٹ نے توشہ خانہ فوجداری کیس کے ٹرائل کے خلاف دائر اپیلوں کی سماعت کے دوران بیرسٹر سلمان صفدر کو عمران خان سے ملاقات کی اجازت دیتے ہوئے انہیں عدالتی نمائندہ (فرینڈ آف دی کورٹ) مقرر کیا تھا۔

یہ سماعت چیف جسٹس یحییٰ آفریدی کی سربراہی میں قائم دو رکنی بینچ نے کی تھی۔ عدالت نے حکم دیا تھا کہ بیرسٹر سلمان صفدر اڈیالہ جیل جا کر بانی پی ٹی آئی عمران خان سے ملاقات کریں اور ان کی صحت، حالات اور جیل میں فراہم کی جانے والی سہولیات سے متعلق تفصیلی تحریری رپورٹ پیش کریں۔

سپریم کورٹ نے اس کے ساتھ ساتھ سپرنٹنڈنٹ اڈیالہ جیل سے بھی عمران خان سے متعلق الگ رپورٹ طلب کر لی تھی۔ چیف جسٹس نے ہدایت کی تھی کہ سلمان صفدر ملاقات کے بعد رپورٹ جمع کرائیں، جس کا عدالت جائزہ لے گی، جبکہ اگلی سماعت رپورٹ موصول ہونے کے بعد کی جائے گی۔

عدالت نے کیس کی سماعت 12 فروری تک ملتوی کر دی ہے۔