8 فروری کو پی ٹی آئی کی شٹر ڈاؤن کال پر عوام کا بھرپور ردِعمل، ملک بھر میں احتجاجی سرگرمیاں

اسٹاف رپورٹ :پی این نیوز ایچ ڈی

پاکستان تحریک انصاف (پی ٹی آئی) کی جانب سے 8 فروری کو دی گئی شٹر ڈاؤن اور احتجاجی کال کو عوام کی بھرپور حمایت حاصل ہوئی، جس کے نتیجے میں ملک کے مختلف شہروں میں کاروباری سرگرمیاں جزوی طور پر معطل رہیں اور سڑکوں پر عوامی احتجاج دیکھنے میں آیا۔ یہ احتجاج عام انتخابات کو ایک سال مکمل ہونے پر مبینہ تاریخی دھاندلی، مہنگائی اور بانی پی ٹی آئی عمران خان کی مسلسل غیر قانونی قید کے خلاف ریکارڈ کرایا گیا.

اسلام آباد، لاہور، کراچی، پشاور، کوئٹہ سمیت متعدد شہروں میں پی ٹی آئی کارکنان اور شہریوں نے پُرامن احتجاج کیا، جبکہ کئی علاقوں میں دکانیں بند رہیں اور ٹریفک معمول سے کم رہی، جو عوامی ردِعمل کا واضح ثبوت ہے.

پی ٹی آئی قیادت کا کہنا ہے کہ 8 فروری کا شٹر ڈاؤن عوامی ریفرنڈم ثابت ہوا، جس سے یہ واضح ہو گیا کہ قوم آج بھی عمران خان کے بیانیے کے ساتھ کھڑی ہے۔ پارٹی رہنماؤں کے مطابق عوام نے مہنگائی، بے روزگاری، معاشی بدحالی اور سیاسی انتقام کے خلاف بھرپور آواز بلند کی.

پی ٹی آئی رہنماؤں نے کہا کہ بانی چیئرمین عمران خان کی جیل میں قید کے باوجود پارٹی کا عوامی رابطہ کمزور نہیں ہوا بلکہ عوامی حمایت مزید مضبوط ہوئی ہے۔ انہوں نے زور دیا کہ شٹر ڈاؤن مکمل طور پر پُرامن رہا اور کارکنان نے نظم و ضبط کا مظاہرہ کیا.

دوسری جانب حکومتی دعوؤں کے برعکس زمینی حقائق اس بات کی گواہی دے رہے ہیں کہ عوام نے پی ٹی آئی کی کال پر لبیک کہا۔ پارٹی ترجمان کا کہنا تھا کہ حکومتی دباؤ، گرفتاریوں اور رکاوٹوں کے باوجود عوام کا گھروں سے نکلنا اس بات کا ثبوت ہے کہ ملک میں حقیقی جمہوریت کے لیے جدوجہد جاری ہے.

سیاسی مبصرین کے مطابق 8 فروری کا احتجاج پی ٹی آئی کی سیاسی قوت اور عوامی مقبولیت کا واضح اظہار ہے، جو اس بات کی نشاندہی کرتا ہے کہ عمران خان کی قیادت کے بغیر بھی پارٹی منظم اور متحرک ہے.

پی ٹی آئی نے اعلان کیا ہے کہ عوامی حقوق، آئین کی بالادستی اور حقیقی آزادی کی جدوجہد اس وقت تک جاری رہے گی جب تک عوام کے مینڈیٹ کا احترام نہیں کیا جاتا.