بروقت تشخیص، محفوظ زندگی ، ایلیٹ فورم کی سالانہ آگاہی نشست

الخبرسعودی عرب رپورٹ جویریہ اسد : پی این پی نیوز ایچ ڈی

ایلیٹ فورم ہر سال بریسٹ کینسر سے آگاہی کے لیے ایک سیشن کا اہتمام کرتا ہے، جس کا مقصد خواتین میں اس مہلک بیماری کے بارے میں شعور اور احتیاطی تدابیر کو فروغ دینا ہے۔

اس سال ایلیٹ فورم کے الخبر برانچ نے یہ آگاہی سیشن منعقد کیا، جس کی قیادت ایلیٹ فورم الخبر برانچ کی کوآرڈینیٹر محترمہ ثنا بتول نے کی، جبکہ محترمہ سائرہ بٹ نے ان کا بھرپور ساتھ دیا۔ اس تقریب میں خواتین کی بڑی تعداد نے شرکت کی۔

سیشن کا مقصد خود معائنہ کی آگاہی، ذہنی صحت اور بریسٹ کینسر سروائیورز کے تجربات کو اجاگر کرنا تھا۔

ڈاکٹر راحت نے اپنی گفتگو میں بتایا کہ بریسٹ کینسر کی بروقت تشخیص کے لیے باقاعدہ طبی چیک اپ اور خود معائنہ نہایت ضروری ہے۔ محترمہ شجیعہ اور محترمہ مہوش خالد نے اس بات پر زور دیا کہ یہ بیماری نہ صرف جسمانی بلکہ ذہنی طور پر بھی متاثر کرتی ہے، اس لیے مریضہ کے لیے ایک مثبت اور حوصلہ افزا ماحول فراہم کرنا ضروری ہے تاکہ وہ علاج کے ساتھ ساتھ امید اور ہمت کے ساتھ اس بیماری کا مقابلہ کر سکے۔

تقریب میں سروائیور خواتین نے بھی اپنے تجربات اور جدوجہد کی کہانیاں شیئر کیں، جنہوں نے شرکاء کو گہرائی سے متاثر کیا اور انہیں حوصلہ دیا۔

مجموعی طور پر یہ سیشن نہایت معلوماتی، متاثر کن اور حوصلہ افزا رہا، جس نے خواتین کو اپنی صحت کے بارے میں زیادہ محتاط اور باخبر رہنے کی ترغیب دی۔

آخر میں محترمہ ثنا بتول نے تمام شرکاء کو ایلیٹ فورم کی جانب سے تحائف پیش کیے، جو امید، ہمت اور مثبت سوچ کی علامت تھے.